2019 жылдың мамыр айының күнтізбесіне өзгеріс енгізілді

Үкіметтің 2018 жылдың 26 желтоқсанындағы қаулысына сәйкес мамыр айының демалыстар күнтізбесіне өзгерту енгізді.  

«2015 жылдың 23 қарашасынан күшіне енген Еңбек кодексінің 85-бабы 3-тармағына сәйкес, Қазақстан үкіметі 2019 жылдың 4 мамыры – сенбі күнгі демалысты 2019 жылдың 10 мамырына ауыстыруға қаулы шығарды», — делінген еліміздің нормативтік-құқықтық актілерінің Ақпараттық-құқықтық жүйесінің сайтында жарияланған құжатта.

Осылайша Жеңіс күні – 9 мамырдан бастап қатарынан төрт күн (9-12 мамыр) демалыс беріледі, 2019 жылдың 4 мамыры, сенбі – жұмыс күні.  

Сондай-ақ қазақстандықтар  1 мамыр – Қазақстан халқының бірлігі күні (сәрсенбі) мен 7 мамыр – Отан қорғаушы күнінде (сейсенбі) қосымша демалыс алады.

2019 жылдың мамыр айында қазақстандықтар 11 күн демалады.