Митингілер мен бұқаралық шаралар жаппай індет жұқтыруға себеп болады – Бекшин

Алматы қаласының мемлекеттік бас санитарлық дәрігері Жандарбек Бекшин мегаполисте коронавирус инфекциясын жұқтыру жағдайларының әлі де азаймағанын атап өтті, деп хабарлайды Almaty.tv.

Қалада коронавирус індеті бойынша тіркелген оқиғалар әлі жалғасуда, тек өткен тәулік ішінде ғана белгісі байқалған 49 оқиға анықталды, ал бір апта ішінде 334 оқиға тіркелген. Осылайша, шаһарда барлығы 2790 оқиға тіркелді, 10 адам қайтыс болды.

«Індетті жұқтырушылар статистикасы пандемия ауқымының әлі де азаймағанын көрсетеді. Осыны ескере отырып, қаланың бас санитарлық дәрігері әрі санитарлық-эпидемиологиялық жағдайдың нашарлауына жол бермейтін жауапты адам ретінде, соңғы кездері әлеуметтік желілерде тарап жатқан адамдар көп жиналатын бұқаралық шаралар мен митингке шақырудың төзгісіз екендігіне назар аударамын», - деді Жандарбек Бекшин.

Қалада  эпидемия әлі де жалғасып жатқан кезде адамдардың өмірі мен денсаулығына қауіп төндіру барып тұрған жауапсыздық екенін айтқан қалалық бас санитарлық дәрігер көп жиналу, жақын араласу азаматтардың індетті жаппай жұқтыруына әкеліп соғатынын әлемдік тәжірибе көрсетіп отырғанына тоқталды.

«Әлемнің көптеген елдерінде осылай болды. Өйткені, митингтер жұқтыру ошағы саналады. Егер мұндай бұқаралық шаралар індетті жұқтыруға себепші болса, онда митингтерді ұйымдастырушылар заңнамаға сәйкес жауапқа тартылады, тіпті қылмыстық іс қозғалады. Осындай бұқаралық шараларға қатысушылар індет жұқтыратын болса, онда эпидемиологиялық тексеру аясында шеттетіледі», - деді Ж.Бекшин.

COVID-19 вирусын жұқтырғандар инфекциялық ауруханаға жатқызылады.

«Олармен  араласқандар, мейлі олар індетті кепшілік жерде немесе үйде жұқтырсын, провизорлық және карантиндік госпитальда оқшауланады. Санитарлық-эпидемиологиялық хаттаманың талаптары осындай, біз оны міндетті түрде орындаймыз», – деді қалалық бас санитарлық дәрігер.

Хаттамаға сәйкес, санитарлық-эпидемиологиялық қызметкерлер карантин режимінде жаппай жиындарға қатысқан азаматтарды тіркеп, видеотүсірілім жүргізеді.

Ал тіркеу қатысушылар санын есептеп, жұқтыру ошағының эпидемиологиялық тексеруін одан ары жүргізіп, коронавирустың таралуының алдын алу үшін қажет.

Бұқаралық  шараларға, митингтерге  қатысушылар коронавирус жұқтырудың эпидемиялық тізбегін құрайды.

«Осының салдарынан індет сіздің үйіңізге, отбасыңызға тарайды, ең алдымен балаларға және қарт адамдарға қауіп төндіреді. Міне, сондықтан мен бұрындары Алматы қаласының аумағында түрлі бұқараларық шараларды өткізуге тыйым салу жөнінде қаулы қабылдаған едім.

Қарт адамдар мен бұрыннан қалыптасқан сырқаты бар жандардан адамдар көп жиналатын жерлерден аулақ жүруді сұраймын. Өйткені, сіз індетті тез жұқтыратындар санатына жатасыз», - деді Жандарбек Бекшин.

Бұдан өзге, жаппай жұқтыру қаупінің болуы мүмкін екендігін ескере отырып, тиісті қызметтерден адамдар көп жиналатын орындарға  дезинфекция жүргізуді күшейтуді талап ететінін ескерткен қалалық бас санитарлық дәрігер ол талаптар мен өтініштердің қаланың әр тұрғынының денсаулығын қорғау мен санитарлық-эпидемиологиялық жағдайларды жақсартуға негізделгенін атап өтті.

«Сондықтан барлық алматылықтардан саналылық пен жауапкершілік танытуды өтінемін. Өйткені, қоғамның денсаулығы әрқайсымыздың жеке  қауіпсіздік шараларын мүлтіксіз орындауымыздан құралады», - деді ол.