Бірыңғай жинақтаушы зейнетақы қорының активтері ұлғайды

Биыл Бірыңғай жинақтаушы зейнетақы қорының активтері 1 трлн теңгеге ұлғайды, деп хабарлайды Almaty.tv.

Үкімет отырысында баяндама жасаған ҚР Ұлттық банкі төрағасының орынбасары Виталий Тутушкин қаңтар-сәуір аралығында қорға 81,8 млрд теңге зейнетақы төлемдері түскеніне тоқталды.

- Бірыңғай жинақтаушы зейнетақы қорының зейнетақы активтері жыл басынан бері 7,2%-ға немесе 1 трлн теңгеге ұлғайып, сәуірдің соңында 15,7 трлн теңгені құрады. Жыл басынан бастап инвестициялық кіріс көлемі 482 млрд теңге, зейнетақы жарналары – 664 млрд теңге, зейнетақы төлемдері – 81,8 млрд теңге, мерзімінен бұрын алу сомасы шамамен 47 млрд теңге болды, - деп алғашқы тоқсанның есебін ұсынды Виталий Тутушкин.

Оның айтуынша, аталған аралықта Ұлттық банктің алтын-валюта резервтері 0,5%-ға өсіп, 58,7 млрд долларға жеткен.

Дереккөз: ҚазАқпарат