Елімізде бос жұмыс орындар жәрмеңкесі онлайн өтеді

Елімізде бос жұмыс орындар жәрмеңкесі алғаш рет онлайн өтеді, деп хабарлайды Almaty.tv тілшісі.

Жәрмеңкеге 18 бен 35 жас аралығындағы жұмыссыз азаматтар қатыса алады. Іс-шара 27-29 маусым күндері электронды еңбек биржасы арқылы жүргізіледі. Ол үшін enbek.kz порталында тіркеуден өту керек. Сайттың басты бетіндегі жәрмеңке баннерін басып, қатысу ережелерімен және бағдарламамен танысуға болады. Айта кетсек, жәрмеңкеде 800-ден астам бос жұмыс орны ұсынылмақ.

«Қазақстанның жетекші жұмыс берушілері жәрмеңке барысында онлайн өзін-өзі таныстыру өткізіп, қолда бар әлеуметтік топтамалары жайлы таныстырулар өткізеді. Қызығушылық танытқан азаматтармен бейне сұхбат жасайды. Бұл жәрмеңке қазақстандық жұмыс берушілерге де, тұрақты, сенімді жұмыс іздегендерге де пайдалы деп сенеміз», – деді «Еңбек ресурстарын дамыту орталығы» АҚ департаменті директорының орынбасары Жанболат Данияров.