Алматы әкімдігінде қоғамдық қауіпсіздік мәселелері қаралды

Алматы әкімдігінде 29 шілдеде қала әкімі Бақытжан Сағынтаевтың қатысуымен қауіпсіздік пен құқықтық тәртіпті қамтамасыз ету мәселелері бойынша кеңес өтті, деп хабарлайды Аlmaty.tv тілшісі қала әкімідігіне сілтеме жасап.

Жиын барысында 4 шілдеде қоғамдық кеңес отырысының нәтижесі бойынша жасалған қылмыс деңгейін төмедету  шаралары қаралды.

Полиция Департаментінің бастығы Серік Күдебаев учаскелік полиция пункттеріне (УПП) жүргізілген тескеру нәтижесі, қылмыс деңгейін төмендету жөніндегі ұсыныстар пакеті туралы баяндады.

Стационарлы учаскелік полиция пункттерінің саны артады. Бұдан өзге, криминалды жағдайға жедел назар аударатын мобилді учаскелік пункттер құрылады.

Қаланың қауіпті учаскелерінің картасы жасалды. Осы картаға сәйкес ПД жаяу және автопатрульдің сызбасы әзірледі.

Барлығы 550 бағыт бойынша патруль жүргізіледі, яғни күн сайын 300 автоэкипаж бен  полицияның 2 мыңнан астам қызметкері қаланы түгел бақылайтын болады.

Бақытжан Сағынтаев аулалар мен қараңғы учаскелерді ескере отырып, сызбаны толықтыруды ұсынды.

«Қылмысты түбегейлі жою үшін нақты шараларды қолданып, жаңа тәсілдерді енгізу қажет. Қала әкімдігі тарапынан лайықты қолдау көрсетіледі. Тұрғындар тәулік бойына қаланың кез келген жерінде өздерін қауіпсіз сезінулері тиіс», - деп атап өтті Алматы әкімі.