Арыстағы қоғамдық тәртіпті қадағалау үшін Ұлтық ұланның 500 жауынгергі жұмылдырылды

Арыс қаласында полиция қызметкерлері қоғамдық тәртіпті сақтауға, эвакуацияланған азаматтардың мүлкін күзетуге тартылды. Жалпы, жеке құрамның 463 қызметкері мен Ішкі істер министрлігі бөліністерінің 53 техникасы Арыс қаласынан көшірілгендерге көмек көрсетуде, деп хабарлайды Қазақстан Республикасы ІІМ баспасөз қызметі.

Мұның ішінде 193 қызметкер және 23 техника азаматтық қорғау органдарына тиесілі. Сондай-ақ 270 қызметкер мен 30 техника полиция бөлімшелеріне тартылды.

Арыс қаласындағы қоғамдық тәртіпті қадағалау үшін ҚР Ұлтық ұланның әскери бөлімінен 500 жауынгер жіберілді.

«Осы факті бойынша ІІМ-нің оңтүстік өңірлік әскери-тергеу басқармасының Шымкент бөлімі Қылмыстық кодекстің 462-бабының 1-бөлігі (қару, сондай-ақ басқаларға қауіп тудыратын заттарды сақтау ережесін бұзу)  бойынша қылмыстық іс қозғалды», - делінген хабарламада.

Барлық жағдай Ішкі істер органдарының қадағалауында.

Сондай-ақ, әлеуметтік желілерде Арыс қаласында балалардың жоғалуы туралы ақпарат таралды. Бұл ақпарат тексерілуде. Оқиға орнынан көшірілгендердің орналасқан жерлерін анықтау шаралары жүргізіліп жатыр.

Ішкі істер министрлігі тұрғындарды үрейге бой алдырмауға шақырады. Ресми ақпараттарға ғана сүйену қажеттігін ескертеді.

Шымкент қаласының Төтенше жағдайлар департаментінде «Қауырт желі» ашылды, онда кез келген ақпаратты тәулік бойы алуға болады. Қауырт желі нөмірі 8 (7252) 44-94-72.