Бүгін Үкіметте Еңбек және әлеуметтік қорғау вице-министрі Светлана Жақыпова Қазақстандағы ерекше жандарға мемлекет тарапынан көрсетілетін көмек мәселесін қозғады. Елімізде 1 шілдеден бастап мүмкіндігі шектеулі бала тәрбиелейтін отбасыға ерекше мәртебе берілуі мүмкін, деп хабарлайды Almaty.tv тілшісі.
Бұл осындай жанұялардың алып отырған жәрдемақысының көлемі артады дегенді білдіреді. Яғни, бүгінде мұндай жанұялар мемлекеттен 30 мың теңгедей жәрдемақы алса, мәртебе берілген күнде бұл сома 40 мың теңгеден аспақ.
«Ұсыныс отбасылардың өздерінен түсті. Министрлік бүгінде мәртебе жайын қарастыруда. Егерде шешім шықса, мүгедектікке төленетін қазіргі жәрдемақы 1 шілдеден бастап 30 пайызға артады. Бұл – қазіргі көмек қаржысы 31 мыңнан 42 мың теңгеге жетеді деген сөз», – деді ҚР Еңбек және xалықты әлеуметтік қорғау вице-министрі Светлана ЖАҚЫПОВА.
Қазір елімізде мүмкіндігі шектеулі 88 мың бала бар. Олардың 15 мыңы үйінде білім алуға мәжбүр. Ерекше күтімді қажет ететін жасөспірімдерге арналған 4000-нан астам түрлі деңгейдегі оқу орны бар. Бірақ бұл көрсеткішке ведомствоның көңілі толмайды. Сондықтан мүгедек жандармен жұмыс істейтін мұғалімдер тағайындап, арнайы платфлорма іске қосылады.
«Егер сыныпта оқи алатын мүмкіндігі болса, басқалармен қатар мектепке барады. Ал егер балада ондай жағдай болмаса, қашықтықтан оқу тәсілін енгіземіз. Осындай білім алу платформасы: мектеп, колледж және университтерде қолға алынады» – деді ҚР Еңбек және xалықты әлеуметтік қорғау вице-министрі Светлана ЖАҚЫПОВА.
Қазақстанда 600 мыңнан астам мүмкіндігі шектеулі жан тіркеуге алынған. Отандық шенеуніктер олардың еміне де көңіл бөлмек. Алдағы уақытта олар қалаған шипажайына тегін жолдама ала алатын болды.
