Ақмола облысында есірткі сатушыдан 18 келі гашиш табылды

Ақмола облысының елордаға жақын аудандарының бірінде полицейлер кезекті есірткі сатушының заңсыз әрекетіне тосқауыл қойды, деп хабарлайды Almaty.tv тілшісі Polisia.kz-ке сілтеме жасап.

Ұзақ мерзімді жедел жұмыстардың нәтижесінде күдікті ұсталып, заңсыз айналымнан 18 килограмнан астам гашиш тәркіленді.

Бұл операцияға полиция департаментінің қызметкерлері мен 5573 әскери бөлімінің кинологтары Макс, Рич және Самурай есімді қызметтік иттермен қатысып, іздестіру және анықтау шараларында маңызды көмек көрсетті.

Тінту барысында төрт аяқты көмекшілер күдіктінің үйінен тыйым салынған зат салынған қапты, сондай-ақ тіркелмеген қаруды тауып, полицейлерге үлкен жәрдемін тигізді. Зерттеу барысында күдіктінің есірткіні сақтап қана қоймай, оны сатумен де айналысқаны анықталды.

Полиция қызметкерлері алдын ала оралған есірткілер мен қажетті құралдарды тәркілеп, оның тұрғылықты жерін "есірткі дүкеніне" айналдырғанын айғақтады.

Қазіргі уақытта аса ірі көлемдегі есірткі заттарын заңсыз сақтау фактісі бойынша сотқа дейінгі тергеу жүргізіліп жатыр.

48 жастағы күдікті уақытша ұстау изоляторына қамалып, тергеу жұмыстары жалғасып жатыр.

Оқи отырыңыз: ШҚО-да мерзімді қызметтегі әскери қызметші қаза болды