Алматы қаласы Білім басқармасының ахуалдық орталығы цифрлық жобалардың халықаралық рейтингінде ТОП-10 қатарына енді

5 қарашада Мәскеу қаласында «Алматы қаласы Білім басқармасының ахуалдық орталығы» таныстырылды. Қазақстандық жоба «Мемлекет және қоғам» халықаралық номинациясы бойынша ТОП-10 үздік жобаның қатарына еніп, Орталық Азиядан іріктелген үздік ондықтағы жалғыз өкіл атанды, деп хабарлайды Almaty.tv.

Таныстырылым цифрлық технологиялар мен коммуникациялар жөніндегі халықаралық форум аясында өтті.

Ахуалдық орталық әлеуметтік желілер мен бұқаралық ақпарат құралдарына мониторинг жүргізуді, азаматтардың өтініштерін талдауды, байланыс орталығының жұмысын және жауапты қызметтермен жедел өзара іс-қимылды біріктіреді. Бұл жүйе мәселелерді ерте кезеңде анықтап, дер кезінде шара қабылдауға мүмкіндік береді.

Жоба жетекшісі Рафаэль Гасановтың айтуынша, орталықтың негізгі міндеті – келіп түскен шағымдарға жауап берумен шектелмей, проблемалық жағдайлардың алдын алуға көшу.

«Өтініштерді тіркеу ғана емес, туындаған мәселелердің себептерін дер кезінде анықтап, жағдай қоғамда кең резонанс тудырмай тұрып шешім қабылдау маңызды. Біз Алматыда дәл осындай тәсілді енгізіп жатырмыз. Бұл тәжірибенің халықаралық деңгейде таныстырылуы біз үшін ерекше маңызды», – деп атап өтті Гасанов.

Таныстырылым барысында орталық жұмысының нақты нәтижелері де айтылды. Атап айтқанда, өтініштердің жекелеген санаттары бойынша жедел әрекет ету уақыты жеті күннен 60 минутқа дейін қысқарған.

Гасановтың сөзінше, Алматы қаласы әкімдігінің осындай бастамаларды қолдауы әлеуметтік салаға заманауи технологияларды енгізуге және мемлекеттік органдардың халықпен өзара іс-қимылының тиімділігін арттыруға мүмкіндік береді.

Оқи отырыңыз: Ғылымдағы жасанды интеллект: Мамандар кері есептерді шешудің жаңа тәсілдерін сараптады