Алматы облысында алаяқтықпен айналысқан дропперлер тобын ұсталды

Алматы облысы ПД киберқылмысқа қарсы іс-қимыл басқармасының қызметкерлері Telegram мессенджері арқылы алаяқтықпен айналысқан топты құрықтады, деп хабарлайды Almaty.tv.

ҚР ІІМ киберқылмысқа қарсы іс-қимыл департаменті мен облыстық прокуратураның үйлестіруімен қылмыстық схеманың үш ұйымдастырушысы мен алты дроппер анықталды. 

"2024 жылғы желтоқсаннан бастап жетекші, өз атына немесе үшінші тұлғаларға банк карталарын ресімдеген 15-тен астам дроппер-тұлғалардан тұратын желіні басқарған. Осы шоттар арқылы 100 миллион теңгеден астам сомаға 500-ден астам операция өтті. Әрбір транзакция үшін жетекші комиссияның 5% алып отырған, бұл оған 10 миллион теңгеден астам пайда әкелді", – деп атап өтті киберполицейлер. 

Қылмыстық схеманың үш ұйымдастырушысы уақытша ұстау изоляторына қамалды. Олардың басқа да осыған ұқсас қылмыстарға қатысы бар-жоғын тексеру жүргізілуде. 

Полиция азаматтарды қырағы болуға және банктік деректерін бөгде адамдарға бермеуге шақырады. Күдікті қаржылық операциялар анықталған жағдайда дереу құқық қорғау органдарына жүгінген жөн.

Оқи отырыңыз: Алматыда тіркелген мопед саны 5 мыңнан асты