Алматы облысында танымал блогердің көлігімен трюк жасамақ болған жігіт қаза тапты

“Экстремалды трюк жасаймын деп қаза тапты.” Алматы облысында 22 жастағы жігіт танымал блогер, кәсіпкер Бейбіт Әлібековтің көлігінің астына түсіп, тіл қатпай кетті, деп хабарлайды Аlmaty.tv тілшісі.

Батырхан Ержанов TikTok желісіндегі байқауға қатысу үшін Әлібековтің автомобилін жалға алып, бейнежазба түсірмек болған. Lamborghini спорт көлігі жоғары жылдамдықпен жүріп өткен кезде жігіт оның үстінен секіріп өтуі керек еді. Алайда ол бұл трюкті орындай алмай, көліктің астында қалған.  

"Бәріңіз білетіндей, Батырхан Ержанов менен бірнеше мәрте көлігімді сұрап, байқауға қатыспақ болды. Мен бұған қатысты оқырмандарымнан да кеңес сұраған едім. Бірақ трюк шықпай қалды. Не айтарымды да білмеймін. Марқұмның жақындарына көңіл айтамын. Бәлкім көлікті бермеуім керек пе еді", - дейді блогер Бейбіт Әлібеков.

Қайғылы оқиға екі күн бұрын Алматы облысы Ақсай ауылындағы автодром аумағында болған. Спорт көлігін 45 жастағы жүргізуші тізгіндеген екен. Батырхан Ержанов ауыр дене жарақаттарымен, ми контузиясымен Іле ауданындағы ауруханаға жеткізіліп, 30 қазанда ес жимастан көз жұмды.

Бұл факт бойынша полиция қылмыстық іс жүргізіп жатыр.

"22 жастағы жас жігіт абайсызда 45 жастағы жүргізуші басқарған көліктің астына түсті. Оқиға салдарынан жас жігіт аудандық ауруханаға жатқызылды, ал 30 қазанда есін жимаған күйде қайтыс болды. Аталған дерек бойынша полиция қылмыстық іс қозғады. Тергеу әрекеттері жалғасып жатыр", - деді Полиция департаментінің ресми өкілі Меруерт Морякова.

Оқи отырыңыз: Лифт үзілген: Қарағандыда құрылыс нысанында жұмысшы қаза болды