Абай облысындағы монополияға қарсы тексеріс: сот ірі көмір жеткізушісінің заңсыз табысын тәркіледі

ҚР Бәсекелестікті қорғау және дамыту агенттігінің Абай облысы бойынша департаменті аймақтағы ірі отын жеткізуші кәсіпорындардың бірі — «Қаражыра» АҚ-на қатысты жүргізілген монополияға қарсы тергеп-тексеру жұмыстарын аяқтады. Серіктестік коммуналдық-тұрмыстық көмірдің көтерме бағасын қолдан өсірді деп айыпталды, деп хабарлайды Аlmaty.tv.

Тергеу барысында анықталғандай, аталған компания 2022 жылдың бірінші жартыжылдығында көмірді көтерме саудада өткізу нарығындағы өзінің үстем (монополиялық) жағдайын асыра пайдаланған. Олар тұрғындар мен мекемелерге арналған көмірге монополиялық жоғары баға белгілеп, елдің бәсекелестікті қорғау саласындағы заңнамасын өрескел бұзған.

Департамент жинақтаған бұлтартпас айғақтар негізінде әкімшілік іс қозғалды. Семей қаласының Әкімшілік құқық бұзушылықтар жөніндегі мамандандырылған ауданаралық соты істі қарап, компанияны кінәлі деп таныды және тиісті жаза қолданды.

«Сот қаулысымен кәсіпорынға қолданылған шаралардың жалпы сомасы 87,4 млн теңгені құрады. Оның ішінде 52,4 млн теңге көлемінде әкімшілік айыппұл салынса, заңсыз табылған 35 млн теңге монополиялық табыс мемлекет пайдасына тәркіленді», — деп мәлімдеді Абай облыстық монополияға қарсы департамент өкілдері.

Қазіргі уақытта сот шешімі заңды күшіне енді. «Қаражыра» АҚ басшылығы салынған әкімшілік айыппұлды мемлекетке өз еркімен төледі, ал заңсыз монополиялық табыс толығымен бюджетке аударылды.

Сонымен қатар, мемлекеттік орган компанияға монополияға қарсы заңнама талаптарын бұзудың салдарын жою туралы нұсқама шығарды, кәсіпорын оны да толық орындады. Мамандардың айтуынша, бұл шаралар алдағы уақытта отын нарығында ашық баға белгілеуді қамтамасыз етуге және қарапайым тұтынушылардың құқығын қорғауға септігін тигізеді.

Оқи отырыңыз: Құрылыс басталды, құқық қорғалды: Астана прокуратурасы инвесторларды қолдаудың тиімділігін дәлелдеді