Атырауда алимент төлемеген борышкерлерді іздестіру жұмыстары күшейтілді

Атырауда 132 борышкер іздестіріліп жатыр. Жалпы өңірдегі алимент төлемегендердің қарызы 4,8 млрд теңгеден асқан, деп хабарлайды Almaty.tv.

Соңғы 9 айда алимент бойынша 177 адам әкімшілік жауапкершілікке тартылған. Олардың 69-ына айыппұл салынып, 87-сі әкімшілік қамаққа алынған және тағы 21 адам қоғамдық жұмысқа тартылыпты.

Сонымен қатар 6 айдан астам алимент төлеуден қасақана жалтарып жүргендерді қылмыстық жауапкершілікке тарту мәселесі де көтерілді. Полицияға 36 ұсыныс жолданып, 21 жағдай бойынша сотқа дейінгі тергеп-тексеру жүргізілген. Нәтижесінде, 4 борышкердің әрекеті сотта қаралып, бір адамға бас бостандығын шектеу жазасы тағайындалды.

«Бос жұмыс орындары жәрмеңкелері өткізіледі. Есепті кезеңде 5 жәрмеңке ұйымдастырылып, нәтижесінде 81 борышкер жұмысқа орналастырылды. Басты мақсатымыз – балалардың лайықты өмір сүруіне және материалдық жағдайының жақсы болуына мүмкіндік жасау. Алдағы уақытта құқық қорғау органдарымен өзара ынтымақтастықты күшейту, берешекті өндіріп алу жұмыстарын жандандыру, сондай-ақ жеке сот орындаушыларының қызметіне бақылауды күшейту жоспарланып отыр»,– деді Атырау облыстық Әділет департаменті басшысының орынбасары Меруерт Мұзатова.

Оқи отырыңыз: Түркістан өңірінде ауқымды интернет жобасы іске қосылды