Банкте кепілде тұрған көліктер қалайша шетелде сатылып кеткен: тұрғындар әділдік іздейді

9 ай тергелген іс әлі нәтиже бермей отыр. 230-дан аса адам алаяқтарға алданып, автонесие рәсімдеп, қарызға белшеден батқан. Автопарк ашып, адамдарға ақша табуды ұсынған кәсіпкер жүздеген көлікті шетелге сатып, салымшыларды тақырға отырғызып кетіпті. Енді қалтада көк тиын қалмады деп шырылдаған көпшілік құзырлылардан тезірек әрекет етуді сұрап отыр, себебі олардың миллиондаған қарызы күн санап көбейіп келеді, деп хабарлайды Аlmaty.tv тілшісі.     

9 ай бойы әділдікке жетеміз деп үміттерін үзбеген тұрғындар қаладағы барлық құзырлы мекеменің табалдырығын тоздырдық дейді. Бірі бұл компанияның жарқын жарнамасына елітсе, енді біріне таныстары оңай ақша табудың жолын сілтеген екен. Автопарк ашу үшін адам жинап, көлік іздеген кәсіпкер басында әр салымшыға қомақты қаражат беріп, автонесиені алғашқы 3 айда жауып отырған. Артынша хабарсыз кетіп, 231-ден аса адамды сан соқтырып кетті.

«Барлығымыз көліктердің кепілге қойылғанын ойлап, тыныш болдық, бұл бізді алдап кетпейтінінің дәлелі секілді көрінді, барлық құжат қолымызда еді. Бірақ артынша біз ойламаған сұмдық болды, көліктердің бәрі ұрланып кеткен, көбі Ресейге шығарылып, сатылып үлгеріпті. Өзіміз жүгіріп жүріп, нөмірі бойынша іздеп, жартысын ғана таптық», - деді қала тұрғыны Еркеғали Мақсұтов.

«Ол көліктер жалға беріледі, уайымдамаңыз деп уәде берген еді. Менде жалпы сомасы 26 миллион 960 мың теңге, мен оны төлей алмаймын, менде сондай ақша да жоқ», - дейді қала тұрғыны Әнуар Шәкіров.

Жалған автопаркке алданған әр адам кемінде 15 миллион теңгеге жуық қарызға ұрынды. Прокуратура өкілдерінің сөзінше, келтірілген материалдық шығын әлі есептеліп жатыр екен. Бұл оқиғадан кейін талай отбасының шаңырағы шайқалып, үйсіз-күйсіз қалған жандар көбейген көрінеді.

«Алаяқтар алдап, бұлардың машиналарын шетелге шығарған. Ресейдің әрбір қаласында сол көліктерді сатылып жатқан жерінен барып тапты. Қазақстанда банкте кепілдікте тұрған көліктерді неге Ресейде сатып отыр? Екіншіден, енді зардап шеккендер Мәскеуге, Саратовқа барып келіп жүр. Көліктерін қайтара алмай жатыр, қайтаратын заң да жоқ», - деді қоғамдық қордың басшысы Бибінұр Шерәлиева.

Заңсыз пайда табу жолын ойластырып, жүздеген адамды құрыққа түсірген алаяқ қазір қамауда отыр, бірақ жәбірленушілердің заңгері істе тағы бірнеше қылмыскер барын алға салып, оларға қатысты іс қозғауды талап етіп отыр. 

«Біздің арызымыздан кейін банк қызметкерлеріне қатысты және көліктерді басқа елге, Ресейге тасыған тасымалдаушыларға қатысты қылмыстық іс тіркелген. Сол қылмыстық іс аясында біз әділеттілік орнатамыз деп уәде беруде. Бұл қылмыстық іс бойынша шет мемлекетке көліктерді алып кеткен адамдар туралы мәліметтер алдым, олардың бәрі бұрын сотты болған екен», - деді заңгер Ғабит Өмірбек.

«Қазіргі таңда Алматы қаласы Жетісу аудандық басқармасымен күдікті Ермағамбетке қатысты ҚР Қылмыстық кодексінің 190-бабы 4-бөлігі 2-тармағымен сотқа дейінгі тергеп, тексеру басталды. Оған қатысты бұлтартпау шарасы қолданылған. Қазіргі таңда қылмыстық қудалау барысында тиісті тергеп-тексеру әрекеттері толығымен жүргізілуде», - деді тергеу басқармасы бастығының орынбасары Дәурен Динбаев.

Көліктерді тасымалдап, қыруар қаржыны қалтасына басып қашқан азаматтардың көбі бұрын істі болған көрінеді. Ақша табамыз деп жапа шеккен жұрт енді тұзаққа түскендей күнелтуде. Жәбірленушілердің басты тілегі – барлық алаяқты ұстап, қарыздардан құтылу.

Әйкерім Пернебек, Сағынғали Мұңайтпасов

Оқи отырыңыз: Адам да, мал да мұзға түсіп кететін: Түркістан облысында жыр болған көпір салынды ма