Қазақстандықтар зейнетақы жинақтарын басқару стратегиясын өздері таңдай алады

Қазақстандықтар зейнетақы жинақтарын басқару стратегиясын өздері таңдай алады. Қаржы нарығын реттеу және дамыту агенттігі зейнетақы активтерін инвестициялау ережелеріне өзгерістер енгізді, деп хабарлайды Almaty.tv.

Бұған дейін инвестициялық портфельді басқарушылар (ИПБ) барлық клиенттер үшін жасына қарамастан бір ортақ портфель құратын. Енді бұл тәсіл өзгеріп, салымшыларға үш түрлі инвестициялық стратегия ұсынылады:

• Консервативті портфель – жасына қарамастан барлық салымшыларға қолжетімді. Облигацияларға бағытталған, ал нәтижесі әр жылдың қорытындысы бойынша бағаланады.

• Қалыпты портфель – зейнет жасына 3 жылдан астам уақыт қалған азаматтарға арналған. Акциялар мен облигациялар үлесі қатар жүреді, нәтижесі 3 жылда бір рет қорытындыланады.

• Қатерлі (агрессивті) портфель – зейнет жасына 13 жылдан астам уақыт қалғандар үшін. Негізінен акцияларға негізделген бұл портфельдің кірісі жоғары болуы ықтимал, бірақ нарықтағы құн ауытқуы да күштірек болады. Нәтижесі 5 жылдың қорытындысы бойынша бағаланады.

Негізгі жаңалықтар мен талаптар:

• Кірістілік кепілдігі: Әрбір портфель үшін ең төменгі кірістілік шегі белгіленген (консервативті үшін – 90%, қалыпты үшін – 85%, қатерлі үшін – 80%). Егер басқарушы көрсетілген мерзім қорытындысы бойынша осы межеден төмен нәтиже көрсетсе, айырмашылықты өзінің меншікті капиталы есебінен өтейді.

• Шетел валютасындағы үлес шегі: Консервативті портфельде – 40%-дан, қалыптыда – 70%-дан, ал тәуекелдіде – 80%-дан аспауы тиіс.

• Стратегияны ауыстыру: Салымшылар жинақтарын бір басқарушының әртүрлі портфельдері арасында БЖЗҚ сайты арқылы өтініш беріп, жылына бір рет ауыстыра алады. Жасыңызға сәйкес келмейтін портфельді БЖЗҚ автоматты түрде қолайлы нұсқаға өзгертеді.

• Басқарушыны таңдау мүмкіндігі: Еске сала кетейік, биыл қыркүйектен бастап азаматтар зейнетақы жинақтарының 100%-ға дейінгі бөлігін жеке басқарушыларға бере алады. Бүгінде бұл бағытта 6 инвестициялық портфельді басқарушы компания қызмет атқаруда.

Жаңа қаулы ресми жарияланған күннен кейін күнтізбелік он күн өткен соң қолданысқа енгізіледі. Бұл өзгерістер жинақтардың ұзақ мерзімді кірістілігін арттырып, нарықтағы бәсекелестікті күшейтеді деп күтілуде.

Оқи отырыңыз: Банк шоты бұғатталған кезде не істеу керек