Қазақстанда мүлік салығынан кімдер босатылады

Маңғыстау облысы бойынша Мемлекеттік кірістер департаменті әлеуметтік желілер мен мессенджерлерде тарап жатқан зейнеткерлер жеке тұлғалардың мүлік салығынан толығымен босатылатыны туралы ақпараттың шындыққа жанаспайтынын мәлімдеді, деп хабарлайды Аlmaty.tv.

Ведомстводан атап өткендей, Қазақстан Республикасының Салық кодексіне сәйкес бөлек тұратын зейнеткерлер заңды мекенжайы (олардың тұрғылықты мекенжайы) бойынша тек қана зейнеткерлер тіркелген барлық салық салу объектiсінiң жалпы құнынан айлық есептік көрсеткiштің 1000 еселенген мөлшері шегiнде босатылады. Есептеу барысында республикалық бюджет туралы заңда белгіленген және тиісті қаржы жылының 1 қаңтарына қолданыста болатын айлық есептік көрсеткiш мөлшері қолданылады.

Оқи отырыңыз: "Біржан Сара ізімен": айтысқа қатысушылар көрерменін несімен тәнті етті

Сонымен қатар келесі тұлғалар да жеке тұлғалардың мүлік салығынан:

• айлық есептік көрсеткiштің 1000 еселенген мөлшері шегiнде – Кеңес Одағының батырлары, Социалистiк Еңбек ерлерi, "Халық қаhарманы", "Қазақстанның Еңбек Ері" атақтарына ие болған, үш дәрежелi Даңқ орденiмен және "Отан" орденiмен наградталған адамдар, «Батыр ана» атағымен және «Алтын алқа» алқасымен наградталған көпбалалы аналар;
• айлық есептік көрсеткiштің 1500 еселенген мөлшері шегiнде – Ұлы Отан соғысының ардагерлері, жеңілдіктер бойынша Ұлы Отан соғысының ардагерлеріне теңестірілген ардагерлер және басқа мемлекеттердің аумағындағы ұрыс қимылдарының ардагерлері, Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен наградталған адамдар, сондай-ақ 1941 жылғы 22 маусым – 1945 жылғы 9 мамыр аралығында кемінде алты ай жұмыс істеген (қызмет өткерген) және Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен наградталмаған адамдар, мүгедектігі бар адамдар, сондай-ақ Салық кодексінің 526-бабының 2-тармағында белгіленген өзге де тұлғалар босатылады.

Департамент өкілдері 2024 жыл үшін мүлік салығын төлеу мерзімі 2025 жылдың 1 қазанында аяқталатынын еске салды.

Сондай-ақ мамандар салық мәселелері бойынша қосымша түсініктемелер алу үшін және жалған ақпарат тарататын алаяқтардың құрбанына айналмас үшін ресми ақпарат көздеріне хабарласу керек екенін атап өтті.

Оқи отырыңыз: Су тасқыны: Қызылжар ауданында ауыл тұрғындары эвакуацияланып жатыр