Орнына жаңасы бой көтереді: Астанада ескі футбол стадионы сүріле бастады

Астанадағы Қажымұқан Мұңайтпасов атындағы футбол стадионында құрылыс жұмыстары басталып кетті. Қазір онда ғимарат бұзылып жатыр. Ескі стадионды жаңартуға 15 миллиард теңге жұмсалмақ. Жаңа ойын алаңы қандай болады? Елорданың оң жағалауындағы стадионның құрылысы неге сонша созылып кетті? Әуелдегі жоба қандай еді? AlmatyTV тілшісі Өмір Серікбекұлы біліп қайтты.

Стадионның қаңырап бос тұрғанына бірнеше жылдың жүзі болды. Жанкүйерлер отыратын трибуна құлайтындай жағдайға жетіп, апатты деп танылған. Оның үстіне, қала тұрғындары қараусыз қалған ғимаратты паналайтын үйсіздер көбейді дейді.

"Емін-еркін кіріп-шығуға болатын қараусыз ғимарат қаңғыбас адамдардың мекеніне айналатыны сөзсіз», «Әнеугүні біреуі не ары, не бері түсе алмай, асылып тұрған. Әрқашан жастар отырады», «Ол жерде әрқашан топ-топ болып жастар отыратынын байқап қаламын, ішімдік ішетіндер де көп жиналады", - дейді тұрғындар.   

1998 жылы елорда таныстырылымы дәл осы алаңда өткен екен. Кейін сол жағалауға жаңа стадиондар салынып, бұл елеусіз қалыпты. 2019 жылы қала балансына өтіп, бір жылдан кейін арена апатты деп танылған. Астана билігі бұл жерге басқа стадион саламыз деп жобалық-сметалық құжаттама әзірлепті. Алғашқы жоспар бойынша төбесі ашық стадион болуы керек еді. Алайда УЕФА стандарттары бойынша үсті жабық арена салу шешімі қабылданған екен. Осыған байланысты ойын алаңының құрылысы ұзаққа созылыпты.  

"Стадион тұрған аумақ 2,2 гектар жерді алып жатыр. Мұнда 3 мың 600 орындық жанкүйерлер отыратын мінбер болады. Құрылыс жұмыстары құжат бойынша 2026 жылдың наурыз айына дейін созылады. Біздің есебімізге сәйкес, келер жылдың соңында стадион пайдалануға беріледі", - деді Құрылыс басқармасы басшысының орынбасары Дамир Әбдуәлиев.

Жоспар бойынша жаңа стадион халықаралық талапқа сай болмақ. Жыл он екі ай жарыстар өткізуге де мүмкіндік бар. Айтпақшы, арена тек футбол ойындарын ұйымдастыруға бағытталады. Жауаптылардың сөзінше, ішкі чемпионаттар осында өтеді.

Өмір Серікбекұлы, Данияр Омар, Дастан Темірбекұлы, AlmatyTV, Астана

Оқи отырыңыз: Үш жылдық бюджет бекітілді: Алматыда қандай салаларға көбірек қаржы бөлінбек