Полиция жаңа оқу жылы қарсаңында мектептер маңындағы бақылауды күшейтедіоб

Жаңа оқу жылының басталуына санаулы күндер қалды. Осы кезеңде Қазақстан полициясы балалардың жолдардағы, мектептер мен өзге де білім беру ұйымдарының маңындағы қауіпсіздігін қамтамасыз ету мақсатында күшейтілген жұмыс режиміне көшті, деп хабарлайды Аlmaty.tv.

Polisia.kz порталының хабарлауынша, ел аумағында «Назар аударыңыз, балалар!» республикалық акциясы басталды. Іс-шараға полиция қызметкерлерімен бірге әкімдіктер мен мүдделі мемлекеттік органдардың өкілдері жұмылдырылған.

Негізгі атқарылып жатқан жұмыстар:

• Инфрақұрылымды тексеру: Мектептерге іргелес аумақтардағы жаяу жүргіншілер өткелдері, жол белгілері мен сызықтары тексерілуде. Тексеру қорытындысы бойынша 548 нұсқама берілді.

• Мектеп автобустарының қауіпсіздігі: Оқушыларды тасымалдайтын автобустардың техникалық жағдайы мен балаларды тасымалдау ережелерінің сақталуы қатаң бақылауға алынды.

• Жүргізушілерге ескерту: ІІМ жүргізушілерді жылдамдық режимін қатаң сақтауға, мектеп маңында барынша мұқият болуға және балалардың жолға кенеттен шығып кетуіне дайын болуға шақырады.

Сонымен қатар, полиция өкілдері ата-аналарға балаларға мектепте, көшеде, қоғамдық көлікте және интернеттегі қауіпсіздік ережелерін үнемі түсіндіріп отыру қажеттігін ескертеді. Балалардың қауіпсіздігі — баршамызға ортақ жауапкершілік.