Рождество: әлемде бұл мерекені қалай атап өтеді

Рождество – әлемдегі ең танымал және мерекелік күндердің бірі. Ол Иса Мәсіхтің туған күнін атап өтуге арналған христиан мерекесі ретінде бастау алған. Almaty.tv мереке туралы бірнеше қызықты ақпараттарды ұсынады.

Италияда "Баббо Натале" (Санта-Клаус) сыйлық әкеледі, бірақ басты назар Бефана атты мейірімді сиқыршы әйелге аударылады. 6 қаңтарда ол балаларға тәттілер мен ойыншықтар сыйлайды.

Испанияда Рождестводан кейінгі 6 қаңтар күні Үш Патша күні атап өтіледі. Бұл күні балалар патшалардан сыйлық алады, ал бүкіл елде карнавалдар өтеді.

Норвегиялықтар Рождество қарсаңында барлық сыпырғыштарды жасырады. Бұл дәстүр ескі сенімдерге негізделген, өйткені сыпырғыштарға зұлым рухтар мінеді деп есептелген.

Жапонияда Рождество діни емес сипатқа ие. Бұл күні адамдар KFC жеуді дәстүрге айналдырған. Бұл дәстүр 1970-жылдары басталған жарнама кампаниясынан туындаған.

Филиппинде Рождество әлемдегі ең ұзақ тойланатын мереке саналады. Ол қыркүйек айынан басталып, қаңтардың алғашқы жексенбісіне дейін жалғасады. Мереке кезінде әрбір үй түрлі-түсті шамдармен және "паро́л" деп аталатын жұлдыз пішінді шамдармен безендіріледі.

 Мексикада  "Лас Посадас" деп аталатын дәстүр бар. Бұл мерекеде адамдар Мәриям мен Жүсіптің қонақжай іздегенін бейнелеп, есіктен есікке барады. Әрбір кеш дұға және дәстүрлі тамақпен аяқталады.

Венесуэладағы Каракас қаласында Рождество таңында шіркеуге роликпен бару дәстүрге айналған. Бұл ерекше дәстүр жолдардың арнайы жабылуымен және мерекелік көңіл-күймен ерекшеленеді.

Эфиопияда Рождество "Ганна" деп аталады және 7 қаңтарда атап өтіледі. Бұл күні адамдар ақ киім киіп, шіркеуге барады.

Оңтүстік Африка Рождество жаз айларына сәйкес келеді. Отбасылар пикниктер мен барбекю ұйымдастырып, табиғатта уақыт өткізеді.

Австралияда  Рождество жаздың аптап ыстығында өтеді. Көптеген австралиялықтар жағажайға барып, теңізде шомылып, суық сусындармен мерекені атап өтеді.

Ерекше дәстүрлер:

Исландия: "13 Рождество жігіттері" (Yuletide Lads) дәстүрі бойынша, әрбір күнде бір тролль балаларға сыйлық немесе жазалау ретінде картоп қалдырады

Чехия: Рождество қарсаңында бойдақ қыздар есікке арқа бұрып, аяқ киім лақтырады. Егер аяқ киімнің тұмсығы есікке қарап тұрса, олар алдағы жылы тұрмысқа шығады.

Бұл мереке әр елде әртүрлі сипатта тойланады, бірақ оның негізгі мәні – отбасы, махаббат пен мейірімділікке баса назар аудару.

Оқи отырыңыз: Мемлекет басшысы православ христиандарын Рождество мерекесімен құттықтады