Шымкентте бүлдіршіндерді инемен қорқытқан тәрбиеші жұмыстан қуылды

Шымкентте бүлдіршіндерді инемен қорқытқан балабақша тәрбиешісі жұмыстан қуылды, деп хабарлайды Almaty.tv.

Сондай-ақ осындай тәртіпсіздікке жол бергені үшін мекеменің меңгерушісі мен тәрбиешінің көмекшісі де қызметінен босатылды. Бұл туралы қала әкімдігі мәлімдеді.

Еске салайық, Тұран ауданындағы №59 «Айша» мемлекеттік балабақшасының қызметкері қолына шприц ұстап, балалардың зәресін алған. Сұмдық оқиғаның видеосы әлеуметтік желіде жылдам тараған. Артынша полиция бірден қылмыстық іс қозғап, мән-жайды анықтауға кіріскен.

Айта кетейік, мұндай келеңсіз жағдайлар қалада былтыр да тіркелген.

«Тәрбиешілердің тарапынан балаға көрсетілген педагогикалық әдепке сәйкес келмейтін 2 факті тіркелген. Балаға күш көрсету. Жекеменшік балабақшада бір қасықпен бірнеше баланы тамақтандырған», – деді қалалық Білім басқармасы басшысының орынбасары Гүлнәр Дәрібаева.

Оқиғаға қатысты қылмыстық іс қозғалғанын еске салайық.