Жауапты қадам: болашақ офицерлер Отанға адал қызмет етуге серт берді

Алматы қаласында Халықаралық білім беру корпорациясының әскери кафедрасында студенттердің әскери ант қабылдауына арналған салтанатты рәсім өтті, деп хабарлайды Almaty.tv. 
Іс-шара барысында әскери кафедраның 350 студенті әскери ант қабылдады. Олардың қатарында 198 болашақ офицер және 152 запастағы сержант бар. Сонымен қатар, рәсімге қатысушылар арасында үш қыз студент болды.
Салтанатты жиын сап алаңында өтті. Әскери ант мәтіні ресми түрде оқылып, студенттер тарапынан қайталанды. Ант қабылдау рәсімі Қазақстан Республикасына адал қызмет етуге, Отанды қорғауға дайын болуға бағытталған маңызды кезең болып табылады.
Іс-шара аясында үздік студент Жанасыл Жұмәділ Жауынгерлік Тумен қоштасу рәсімін орындады. Бұл рәсім әскери дәстүрлердің сабақтастығын, ерлік пен абырой құндылықтарын бейнелейді.
Салтанатты шараға Халықаралық білім беру корпорациясының басшылығы, ардагерлер, студенттердің ата-аналары қатысты.

Сонымен қатар,іс-шара әскери оркестрдің сүйемелдеуімен өтті. Әскери ант қабылдау — әскери қызмет жолына қадам басқан әрбір азамат үшін маңызды рәсім болып табылады және қатысушылар үшін жаңа жауапты кезеңнің басталуын білдіреді.

Оқи отырыңыз: Алматыда болашақ офицерлер шеруі өтті