Жедел жәрдем бригадалары жеті айда 5,2 млн шақыртуға қызмет көрсетті

2026 жылдың алғашқы жеті айында Қазақстанның жедел медициналық жәрдем қызметі 5,2 миллионнан астам шақыртуға қызмет көрсетті. Бұл – тәулігіне шамамен 25 мың шақырту, деп хабарлайды Аlmaty.tv.

ҚР Денсаулық сақтау министрлігінің баспасөз қызметінен хабарлағандай, әрбір осындай көрсеткіштің артында аман алып қалған өмірлер, пациенттерге дер кезінде көрсетілген көмек және еліміздің түкпір-түкпірінде тәулік бойы қызмет атқарып жүрген мыңдаған медицина қызметкерлерінің еңбегі тұр.

Жедел медициналық жәрдем қызметі Қазақстандағы ең сұранысқа ие медициналық қызметтердің бірі болып қала береді.

Күн сайын жедел жәрдем бригадалары инфаркт, инсульт, ауыр жарақат, созылмалы аурулардың асқынуы кезінде шақыртуларға шығып, шұғыл босануды қабылдайды, сондай-ақ жол-көлік оқиғаларынан зардап шеккендерге медициналық көмек көрсетеді.

"ҚР Денсаулық сақтау министрлігінің Ұлттық шұғыл медицинаны үйлестіру орталығының мәліметінше 2026 жылдың жеті айында жедел медициналық жәрдем қызметі 5 253 200 шақыртуға қызмет көрсеткен", - делінген ведомство хабарламасында.

Бүгінде еліміз бойынша 20 дербес жедел медициналық жәрдем станциясы, 92 қалалық қосалқы станция және 189 аудандық бөлімше жұмыс істейді. Соның арқасында шұғыл медициналық көмек ірі қалалардың тұрғындарына да, шалғай елді мекендерде тұратын азаматтарға да қолжетімді.

"Тәулігіне кезекшілікке 1 669 көшпелі бригада шығып, тәулік бойы көмек көрсетуге дайын тұрады. Жедел әрекет ету үшін 2 728 жедел медициналық жәрдем автокөлігі пайдаланылады. Оның ішінде 1 733-і қалаларда, ал 995-і ауылдық жерлерде қызмет көрсетеді", - делінген хабарламада.

Жедел медициналық жәрдем қызметін дамыту денсаулық сақтау жүйесінің басым бағыттарының бірі болып қала береді. Пациенттерді бағыттау жүйесі жетілдіріліп, автопарк жаңартылуда, бригадалардың жұмысын ұйымдастырудың заманауи тәсілдері енгізіліп, медицина қызметкерлерінің біліктілігі тұрақты түрде арттырылуда.

Басты мақсат – тұрғылықты жеріне қарамастан, еліміздің әрбір тұрғынын уақтылы әрі сапалы шұғыл медициналық көмекпен қамтамасыз ету. Осыған байланысты жедел медициналық жәрдем қызметінің қолжетімділігі мен тиімділігін арттыруға және оны еліміздің барлық өңірінде одан әрі дамытуға бағытталған кешенді жұмыс жалғасуда.

Оқи отырыңыз: Қауіпсіздік жауапкершіліктен басталады: полиция жүргізушілерге жол ережесін еске салды