Қазақстан қытайлық сайтта жарияланған мақалаға наразылық білдірді

Қазақстан қытайлық сайтта жарияланған мақалаға наразылық білдірді, деп хабарлайды Tengrinews.kz Сыртқы істер министрлігінің баспасөз қызметіне сілтеме жасап.

Ведомство мәліметінше, Сыртқы істер министрлігінде Қытайдың ҚР-дағы Елшісі Чжан Сяомен кездесу өтіп, оның барысында қазақстандық тарап қытайлық www.sohu.com сайтындағы "Қазақстан неге Қытайға оралуға тырысады" атты мақалаға қатысты наразылық білдірген.

"Қытай елшісіне мұндай сипаттағы мақаланың жариялануы 2019 жылғы 11 қыркүйекте Мемлекет басшылары қол қойған Қазақстан Республикасы мен Қытай Халық Республикасының бірлескен мәлімдемесінде айқындалған мәңгілік жан-жақты стратегиялық әріптестік рухына сәйкес келмейтіні атап өтілді. Тараптар ақпарат тарату және БАҚ саласында тығыз өзара ықпалдасуға келісті", - дейді министрліктің баспасөз қызметі.

Сондай-ақ, Қазақстанның Бейжіңдегі Елшілігінің ҚХР Сыртқы істер министрлігіне нота жолдағаны айтылады.