Қазақстан мен Франция арасындағы тауар айналым артып келеді

Францияның Қазақстан экономикасына құйған инвестициясының көлемі шамамен 18,7 млрд долларды құрады. Бұл туралы Қазақстан Республикасының Президенті Қасым-Жомарт Тоқаев Франция президенті Эммануэль Макронмен кеңейтілген құрамдағы келіссөз барысында айтты, деп хабарлайды Аlmaty.tv тілшісі Аkorda.kz-ке сілтеме жасап.

1 қарашада Ақорданың баспасөз қызметі хабарлағандай, Қасым-Жомарт Тоқаев қазір Қазақстан мен Франция арасындағы түрлі салалардағы ынтымақтастық жаңа деңгейге көтеріліп келе жатқанын атап өтті. 

- Франция Қазақстанның Еуропадағы өте маңызды және сенімді серіктесі. Өткен жылы өзара тауар айналымы 30%-ға өсіп, 4 млрд долларға жетті. Биылғы сегіз айда екіжақты сауда көлемі өткен жылмен салыстырғанда 21%-ға өсіп, 2,7 млрд долларға жетті, - деді Мемлекет басшысы.

Қасым-Жомарт Тоқаевтың айтуынша, Франция Қазақстанға 18,7 миллиард долларға жуық инвестиция салған. Елдер энергетика (соның ішінде ядролық), тау-кен және химия өнеркәсібі, машина жасау, құрылыс материалдарын өндіру салаларында бірлескен жобаларды жүзеге асыруда. Аэроғарыш, фармацевтика және басқа да салаларда ынтымақтастық дамып келеді. Сонымен қатар, елдер Қазақстан-Франция бизнес форумында жан-жақты талқыланатын бірқатар маңызды жобаларды жүзеге асыруды жоспарлап отыр. Бұған дейін Қазақстан Республикасының Энергетика министрі Алмасадам Сәтқалиев Эммануэль Макронның Астанаға сапары барысында энергетика саласындағы қандай бірлескен жобалар талқыланатынын айтқан болатын.

Оқи отырыңыз: Ақордада Эмманюэль Макронды салтанатты түрде қарсы алу рәсімі өтті