Петропавлда саяжайдағы өрттен ерлі-зайыптылар қаза тапты

Петропавлда саяжайдағы өрт салдарынан ерлі-зайыптылар қаза тапты, деп хабарлады Солтүстік Қазақстан облысының Төтенше жағдайлар департаментінің басқарма бастығы Игорь Балеев брифингте.

Осы аптаның сәрсенбіге қараған түні Петропавл шетіндегі «Ракета» бау-бақша қауымдастығында орналасқан саяжайлардың бірінен өрт шыққан. Оқиға орнынан екі адамның денесі табылды.

«41 жастағы ерлі-зайыптылар тұрмыстық газ құрылғысын пайдалану кезінде қауіпсіздік ережесін бұзу салдарынан көз жұмды», – дейді Балеев.

 Басқарма бастығының айтуынша, соңғы кездері саяжай учаскелерінде өрт жиілеп кеткен. Жыл басынан бері мұнда 8 үй-жай өртеніп, 3 адам қаза болған.

Айта кетейік, 2019 жылдың басынан бері өңірде 369 өрт шығып, 24 адам құрбан болған.

Дереккөзі: Sputnik