Парамен ұсталған Алматы-1 стансасының басшысына 18 миллион теңгеге жуық айыппұл салынды

Сыбайлас жемқорлыққа қарсы күрес қызметінің  хабарлауынша  сот отырысы 4 қыркүйек күні Алматыда өткен, деп хабарлайды Almaty.tv тілшісі.

«Қазақстан Теміржолы Жүк тасымалы» Акционерлік қоғамына қарайтын, Алматы-1 стансасының бастығы Құлжабаев пара алғаны үшін кінәлі деп танылған.

Айыпталушы Құлжабаев Қытай Халық Республикасының меншік иелеріне бос контейнерлерді қайтару және кедергісіз тексеру үшін коммерциялық кәсіпорын өкілдерінен делдал арқылы 500 мың теңге көлемінде пара алған.

Ары бері ағылған контейнерлердің қожайындарынан  ақша тауып қалуды ойлаған парақор, енді 17 миллион 800 мың теңге төлеуі тиіс.  Сондай-ақ, сот Құлжабаевты мемлекеттік қызметте жұмыс істеу құқығынан біржола айырды.