Атырауда жарылыс кезінде жақын маңдағы ғимараттар қираған

Бүгін Атыраудағы газ құю стансасында болған жарылыстан төрт адам күйік алып, жақын маңдағы ғимарат қирады, деп хабарлайды Almaty.tv облыстық Төтенше жағдайлар департаментінің баспасөз қызметіне сілтеме жасап.

«Атырау қаласында таңертеңгі сағат 8:42-де «ПромГаз» ЖШС-нің Атамбаев көшесінде орналасқан газ стансасы  аумағында жарылыс орын алды. Оған газ құю кезінде газдың шығуы себеп болған. Сол сәтте «Форд» маркалы автоцистерналы көліктің кабинасы жалынға оранды. Жарылыс кезінде 60-70 метр қашықта тұрған ғимарат қирады», - делінген хабарламада.

Сондай-ақ, жарылыстан әр түрлі дәрежеде күйік алған төрт адам ауруханаға жеткізілді.  Олар – Төтенше жағдайлар департаментіне қарасты өрт сөндіру бөлімінің бөлімше командирі мен өрт сөндірушісі, сондай-ақ, газ тасымалдаушы көліктің  жүргізушісі және жанар-жағар май құюшы.

«Өрт сағат 9:58-де толықтай сөндірілді. Жалынды сөндіруге Төтенше жағдайлар департаментінің 25 қызметкері мен  4 техника жұмылдырылды», - делінген ақпаратта.