Алматының Бостандық және Әуезов аудандарында екі көшенің бойында жол жабылады

Жоспарлы жылу желілерін жаңғырту және жөндеу жұмыстарының істелуіне байланысты Алматының бірнеше көшелерінде автокөліктердің қозғалысына шектеулер енгізіледі, деп хабарлайды Аlmaty.tv тілшісі «Алматы жылу жүйесі» ЖШС-не сілтеме жасап.

Әуезов ауданында магистральдық құбыржол учаскесінде жоспарлы жөндеу жұмыстарын жүргізу мақсатында 2024 жылғы 4 шілдедегі сағат 22:00-ден 5 шілдедегі сағат 12:00-ге дейін Сүлейменов көшесінің бойымен Тоқтабаев көшесінен Черепанов көшесіне дейін оңтүстік бағытта көлік қозғалысы жартылай шектеледі. Солтүстік бағытта автокөлік қозғалысы үшін жол ашық болады.

Бостандық ауданында 2024 жылдың 5 шілдесі мен 15 қыркүйегі аралығында Ходжанов көшесінің бойында Алмагүл шағынауданындағы №15 үй ғимаратынан Жароков көшесіне дейінгі аралықта көлік қозғалысы жабылады. Екі бағытта да көлік қозғалысы жабылады.

Бұл уақытша шектеулер 1976 жылдан бері пайдаланылып келе жатқан жалпы ұзындығы 1240 метр болатын, аталған көше аумағының автокөлік жолы бөлігінің астынан өтетін құбырды жаңғырту учаскесінде жоспарлы жұмыстарды жүргізу қауіпсіздігін қамтамасыз ету мақсатында енгізіліп отыр.

Бұл құбыр 153 көппәтерлі тұрғын үйді, 7 жеке тұрғын үйді, 5 балабақшаны, 4 білім беру нысанын, 2 денсаулық сақтау нысанын және 15 басқа нысанды жылумен және ыстық сумен қамтамасыз етеді.

Жаңғырту жұмыстары кезеңінде аталған тұтынушылар ыстық сумен бұрынғысынша үздіксіз қамтамасыз ете берілетін болады.

Естеріңізге сала кетейік, қозғалысты шектеуге қатысты барлық ақпарат Almaty.kz сайтында, @AlmatyJoly Telegram-арнасында, аудан әкімдіктері мен басқармаларының әлеуметтік желілерінде, сондай-ақ «2GIS» және «Яндекс карталары» сервистерінде орналастырылған.

Уақытша қолайсыздықтарға түсіністікпен қарауларыңызды және бұл аумақты айналып өту жолдарын алдын ала қарастыруларыңызды сұраймыз.

«Алматы жылу жүйесі» ЖШС

Оқи отырыңыз: Алматыда Жұмабаев пен Мақатаев көшелерінің қиылысында көлік қозғалысы шектеледі