Көктөбе бөктерінде болған өрттің төменгі тұсында тағы бір ошақ тұтанды. Құтқарушылар бір адамның мәйітін тапты. Бұл туралы Алматы қалалық Төтенше жағдайлар департаментінің басшысы Серік Әубәкіров мәлім етті, деп хабарлайды ҚазАқпарат.
«Қазіргі уақытта бірінші өрттен төменгі жақта, Диваев көшесі бойымен шатқал арқылы өткенде 21-үйге қарсы бетте, шамамен 1 мың шаршы метр аумақта құрғақ шөптің өртенуінің екінші жағдайы тіркелді. Тілсіз жаумен күрес барысында белгісіз адамның денесі табылды. Оның жынысы мен тұлғасы анықталуда. Жұмыстар жерден жүргізілуде. Себебі түнгі уақытта авиация жұмыс істей алмайды», - деп жазды ол Facebook-та.
