Футболдан Еуропа чемпионатының финалдық сатысының топтық кезеңі екінші турында Нидерланды құрамасы Австрияны жеңді, деп хабарлайды Almaty.tv тілшісі ҚазАқпаратқа сілтеме жасап.
Еске салсақ, аталған екі құрама С тобында сынға түседі. Қарсыластары – Украина және Солтүстік Македония. Алғашқы турда Нидерланды Украинадан 3:2 есебімен басым түссе, Австрия Солтүстік Македонияны 3:1 есебімен жеңді.
Бұл топта кеше, 17 маусымда екінші турда Украина Солтүстік Македонияны 2:1 есебімен тізе бүктірді. Екі құрама бұған дейін 19 мәрте кездесті. Оның тоғызында Нидерланды жеңіп, алтауында Австрия басым түссе, қалғанында тең нәтиже тіркелді. Ойынның 11-минутында Австрияға қақпасына белгіленген пенальтиді Мемфс Депай мүлт жіберген жоқ. Ал Дензел Дюмфрис 67-минутта қорытынды есепті белгіледі. Осылайша Нидерланды қарсыласынан 2:0 есебімен басым түсті.
Футболдан Еуропа чемпионатының финалдық сатысының топтық кезеңі екінші турында Бельгия мен Дания құрамалары кездесті. Екі құрама В тобында сынға түседі. Қарсыластары – Ресей және Финляндия. Алғашқы турда Бельгия Ресейден 3:0 есебімен басым түссе, Дания Финляндияға 0:1 есебімен есе жіберді. Алдымен даниялық Юссуф Поульсен 2-минутта есеп ашты. Екінші кезеңде Бельгия құрамасы алдымен таразы басын теңестіруге ұмтылды. Нәтижесінде 54-минутта Торган Азар мергендік танытса, Кевин Де Брёйне 70-минутта өз құрамасын алға шығарды. Бұл топта үшінші тур ойындары 21 маусымда өткізіледі. Бұл күні Финляндия мен Бельгия, Дания мен Ресей құрамалары шеберлік байқасады.
