Ішкі істер министрлігі жол қозғалысы ережесін өрескел бұзатындарды тіркейтін жаңа "Қорғау" бағдарламасын жариялады, деп хабарлайды Almaty.tv тілшісі Tengrinews.kz-ке сілтеме жасап.
ІІМ Парламент Сенаты депутаттарын қоғамдық қауіпсіздікті қамтамасыз ету тұжырымдамасының әзірленіп жатқан жобасы туралы хабардар етті.
"Депутаттарға жол қозғалысы ережесін өрескел бұзатындарды анықтау бойынша "Қорғау" жүйесі жұмысының ерекшеліктерін айттық. Бағдарлама көше камераларының мәліметтерін талдай отырып, жақын маңдағы полицейлердің планшетіне қауіпті жүргізушінің келе жатқаны туралы сигнал береді", – деді Ішкі істер министрлігінің өкілі Шұғыла Тұрлыбек.
"Қорғау" көмегімен тәртіпбұзушылардың 18 мыңға жуық көлігі айып алаңына қойылып, жалған нөмір қолданудың 909 дерегі анықталғаны атап өтілді. Көлік жүргізу құқығы жоқ немесе бұрын құқығынан айырылған үш мыңнан аса жүргізуші ұсталған.
