Бүкіл қазақстандық турист 19 қаңтарға дейін елге оралады. Бұл туралы Мәдениет және спорт министрлігінің баспасөз қызметі мәлімдеді, деп хабарлайды Almaty.tv.
Қазақстанға 6-17 қаңтар аралығында шамамен 90 тұрақты және 30 чартерлік әуе рейсі арқылы 7 361 турист қайтарылды.
17 қаңтардағы мәлімет бойынша, рейстердің кешігуіне байланысты 275 турист, оның ішінде Тайландтан – 192, Шри-Ланкадан – 25, Мальдивтен – 34 және Гоадан – 24 турист елге оралады деп жоспарланған.
«Барлық турист 2022 жылдың 19 қаңтарына дейін Қазақстанға оралатынын хабарлаймыз», – деді министрлікте.
Сонымен қатар шетелдегі барлық туриске рейстердің уақыты өзгергені туралы хабарланды. Қазақстан консулдығының қолдауымен туристік операторлар туристердің шетелдегі қонақүйлерде жайғасуын өз қаражаты есебінен ұйымдастырып отыр.
Қазақстанға жеткен туристер үшін тасымалдау мен орналастыру ұйымдастырылған. Бұл бағыттағы жұмыстар «Туристік Қамқор» КҚ күштерімен жүргізіліп жатыр.
