Ауа райына байланысты Алматы әуежайында 12 рейс кешігіп ұшты

Алматыда жауған қалың қардың салдарынан әуежайда кесте өзгерді, деп хабарлайды Almaty.tv.

12 рейс бір сағатқа кешігіп ұшқан. Оның ішінде Мәскеу, Дубай, Дели, Астана және Павлодар бағытына қатынайтын рейстер бар. Сондай-ақ Стамбұл мен Душанбеге қатынайтын екі әуе бағыты шегерілген. Қазір әуежайдағы жұмыс қалыпты режимге көшкен.  

«Қардың қалың түскеніне қарамастан Алматы әуежайы штатты режімде жұмыс істеп жатыр. Ұшу-қону жолақтары бірден қардан тазаланды. Ұшақтарды көктайғаққа қарсы өңдеу үшін материалдар жеткілікті. Алматы халықаралық әуежайы халықаралық азаматтық авиация ұйымының ІІІ В санатына ие болған еді. Бұл экипажда осындай санат болған жағдайда қалың тұман мен қар жауса да, көрініс 75 метрге түссе де ұшақтарды қабылдай алатынын білдіреді», – деді «Халықаралық Алматы әуежайы» АҚ баспасөз хатшысы Наталья СОКОЛОВА.