Алматылықтар Бүкіләлемдік қар күнін атап өтті

Алматылықтар «Шымбұлақ» тау-шаңғы кешенінде Бүкіләлемдік қар күнін атап өтті. Мерекеге орай балалар шаңғы тебуден сайысқа түсті. Спорт бәсекесінде 5 пен 12 жас аралығындағы балғындар бақ сынасты. Ұйымдастырушылардың айтуынша, жарысқа қатысушылардың белсенділігі жыл санап артып келеді. Мәселен, былтыр 90 бала қатысса, биылғы сайыста 130 бала шаңғы тепті.

«Мен 1-орынды жеңіп алғаныма қатты қуанып тұрмын. Жарыс өте қызықты болды, финишке еш қиындықсыз келдім. Өзім шаңғы тебумен 3 жылдан бері айналысамын. Енді бұрынғыдан да көбірек дайындалатын боламын», – деді жарыс жеңімпазы Денис ШЕВЦЕНКО.