Стив Истербрук қоластындағы қызметкермен байланысы үшін McDonald's жылдам тамақтану мейрамханалар желісінің бас директоры және президенті лауазымынан кетті, деп хабарлайды Tengrinews.kz компания өкілдеріне слітеме жасап.
McDonald's директорлар кеңесінің ойынша, қызметкермен қарым-қатынаста болған 52 жастағы Истербрук компанияның саясатын бұзған. Истербрук болса мұның қателік болғанын айтты.
"Компанияның қағидаларын ескере отырып, мен директорлар кеңесінің пікірімен келісемін, маған да алға жылжитын уақыт келді", - деді ол.
Стив Истербруктің орнына Крис Кемпински келген, ол жексенбіде директорлар кеңесінің құрамына кірді. Осыған дейін McDonald's жаңа президенті мен бас директоры компанияның АҚШ-тағы бөлімшесін басқарды.
Еске салайық, 1940 жылы құрылған McDonald's америкалық корпорациясы әлемдегі ең ірі жылдам тамақтану мейрамханалар желісінің бірі. Бүгінде әлемнің 100-ден аса елінде 38 мыңнан аса мейрамханасы бар.
