Алматының Орталық саябағы жаңартылады

Алматының Орталық саябағы адам танымастай өзгереді. Бүгін қала әкімі Бауыржан Байбек жұмыс сапары барысында мәдениет және демалыс паркін аралап шықты. Басқарушы компания қайта жасауға жеке инвестициядан 1,6 миллиард теңге көлемінде қаражат бөлген. Кешенді жоспар бойынша, жаңарған саябақ аймақтарға бөлінеді. Онда тегін скейтодром, воркаут және спорт алаңдары, балалардың жаңа қалашығы пайда болады. Оған қоса, заманауи аттракциондар тұрғызылады. Саябақта жуық арада тротуарларды жөндеу басталып, талапқа сай келмейтін сауда нысандары алынып тасталады. Сондай-ақ шамамен 30 жылдан бері жұмыс істемей тұрған «Велотрек» қайта жасалады. Ескерте кетейік, құрылыс жұмыстары кезең бойынша жүзеге асырылмақ.