Астанада бойжеткен сұлулық үшін қылмыс жасады

Астанада сұлулық салонынан бағасы қымбат процедураны жасатып, ақшасын төлемей қашып кеткен алаяқ қызды іздестіруде, деп хабарлайды Астана қаласы ІІД-нің баспасөз қызметі.

Астана қаласының полиция департаменті өңір тұрғындарынан алаяқтық әрекет жасаған күдіктінің аты-жөнін анықтауға көмек көрсетулерін сұрайды. 

«Алматы» ауданының полиция басқармасына сұлулық салонының қызметкері келіп, 9 қыркүйек күні өзін Ботагөз деп таныстырған белгісіз бойжеткен Рысқұлбеков көшесіндегі салондардың бірінен шаш өсіру процедурасына тапсырыс бергенін айтып арызданды. Алаяқ 70 мың теңге тұратын қызмет түрін пайдаланған соң, белгісіз бағытта ізін суытқан», - делінген хабарламада. 

Астана полицейлері қызмет көрсету салаларының қызметкерлерін алаяқтардың құрығына түспеу үшін сақ болуды ескертеді.

Сондай-ақ, полицейлер қала тұрғындарынан «Алматы» ауданының ІІБ-ға келіп жәрдемдесулерін немесе төмендегі нөмірлер бойынша хабарласуларын сұрайды: 8 (7172) 71-67-90, 71-61-48 немесе 102.