Консулдар Мәскеуде қамауға алынған қазақстандықпен кездесті

Қазақстандық дипломаттар Мәскеуде Бауман атындағы ММТУ оқытушысына пышақпен шабуылдағаны үшін қамалған Жаслан Құдайбергеновке барды, деп хабарлайды ҚазАқпарат.

«Қазақстан азаматы екі ай мерзімге – 30 тамызға дейін қамалды. Оған адам денсаулығына қасақана зиян келтірді деген айып тағылып отыр. Әзірге тергеу амалдары жүріп жатыр. Күдікті уақытша ұстау оқшаулағышына қамалған. Біздің консулдар оны барып көрді, адвокатымен байланыс орнатты. Ол денсаулығы және қамауда ұстау бойынша шағым айтқан жоқ», – деп мәлімдеген ҚР ІІМ ресми өкілі Айбек Смадияров.

Бұдан бұрын ТАСС хабарлағандай, Мәскеудің Басман аудандық соты Бауман атындағы ММТУ оқытушысына пышақпен шабуылдады деген күдікпен Жаслан Құдайбергеновті екі ай мерзімге «қамауға алу» бұлтартпау шарасын қолдануға шешім шығарған болатын.

Агенттіктің хабарынға сенсек, күдікті, 1992 жылы туған ер адам оқу үлгерімінің нашарлағаны және оқу төлемақысын төлей алмағаны үшін маусым айының басында Мәскеу мемлекеттік техникалық университетінен шығарылған.

29 маусым күні күндіз жоғары оқу орнының бас корпусының аумағында оқытушының артынан келіп пышақ сұғып, ізін суытқан. Жәбірленуші ауруханаға жатқызылып, аман қалған. Осы дерек бойынша РФ Қылмыстық кодексінің 111-бабының («Адам денсаулығына қасақана ауыр зиян келтіру») 2-бөлігіне сәйкес қылмыстық іс қозғалды.