Алматыда Қала күніне орай «Алматының символы – сыйлыққа» атты акция өтті. Іс-шараны Алматы қаласының Туризм басқармасы, Алматы халықаралық әуежайы және ҚР ҰҚК Алматы қаласы Шекаралық бақылау басқармасы бірлесіп ұйымдастырды, деп хабарлайды Аlmaty.tv қала әкімдігінің баспасөз қызметіне сілтеме жасап.
Паспорттық бақылау аймағында халықаралық рейстердің жолаушыларына Алматының жылуы мен қонақжайлылығын білдіретін «апорт» сұрыпты алмалар ұсынылды. Акция шамамен 10 мың жолаушыны және 50-ден астам рейсті қамтыды.
Қалалық туризм басқармасының мәліметінше, бұндай акцияларды өткізу Алматыны туристік бағыт ретінде тартымды етуде маңызды рөл атқарады.
«Алматы Орталық Азияның қаржылық, сауда-экономикалық және мәдени-білім беру орталығы. Қала табиғи ресурстарымен, бай тарихи, мәдени мұрасымен туристерді тартады. Мұнда халықаралық деңгейдегі ірі фестивальдер мен концерттер өтеді.
«Алматының символы – сыйлыққа» акциясы шетелдік туристерді қаланың дәстүрімен, мәдениетімен таныстыруда алғашқы оң әсер қалдыруды көздейді», - деп атап өтті ұйымдастырушылар.
Оқи отырыңыз: Жәрмеңке, концерт және Шапито циркі: Алматыда әйгілі Apple Fest фестивалі өтеді
