Жасыл Алматы: жыл соңына дейін қанша көшет отырғызылады

Алматының жасыл қорын құру және сақтау қала әкімдігі жұмысының негізгі басымдықтарының бірі болып табылады. Бұл туралы Алматы мәслихатының кезектен тыс XII сессиясында мегаполис әкімі Ерболат Досаев мәлімдеді, деп хабарлайды Аlmaty.tv.

Қала басшысы 2023 жылы алаңы 64,8 га 6 қоғамдық кеңістік абаттандырылғанын, 250 мың ағаш пен бұта отырғызылғанын, осы жылдың желтоқсан айының соңына дейін олардың саны 320 мыңға дейін ұлғайтылатынын, бұл Іле-Алатау Ұлттық паркінің жасыл желектерін есепке алмағанда, бір адамға шаққанда жасыл екпелердің алаңын 11,3-тен 12,3 шаршы метрге дейін ұлғайтуға мүмкіндік беретінін айтты.

Алматыдағы жасыл екпелерді автожуу жүйесі 34 скважина мен су қабылдағыштарды салу есебінен 4,4 есе көп аумақты – 587 гектарға дейін (2022 жылы 132 гектардан) қамтыды.

- Биыл 103,5 км арық желісі, 19 коллектор, 9 канал алынды және реконструкцияланады. Атқарылған жұмыстардың  арқасында су басып қалу қаупі бар 102 учаске жойылды. Олар нөсер жаңбыр кезінде біздің азаматтарымызға проблема тудырды. 2024 жылдың соңына дейін жалпы 376 шақырым арық желісі салынып, қайта жаңартылады, оған 10,9 млрд теңге қарастырылған, - деді Ерболат Досаев.

Бұдан басқа 2024 жылға арналған бюджетте Алатау ауданындағы Сайран көлі мен "Сосновый бор" жаңа жасыл қоғамдық кеңістіктер құруға қаржы қарастырылған.

Оқи отырыңыз: Алматыда қанша сумен қамту нысанының құрылысы аяқталады