Талғат Теменовтің туғанына - 70 жыл: Алматыда "Қызыл орамалды шынарым” қойылымы ұсынылды

Биыл Қазақстанның халық әртісі Талғат Теменовтің туғанына 70 жыл толды. Белгілі театр және кинорежиссерінің мерейтойына орай Ғабит Мүсірепов атындағы Академиялық балалар мен жасөспірімдер театрында "Қызыл орамалды шынарым” қойылымы ұсынылды. Қалың көпшіліктің көңілінен шыққан спектакль осыдан 14 жыл бұрын режиссердің жетекшілігімен қайта сахналана бастаған, деп хабарлайды Аlmaty.tv тілшісі.

Сүйіспеншілік, адалдық, достық, көре алмаушылық, жауапкершілік. Мұның бәрі - Талғат Теменовтің жетекшілік еткен фильмдері мен қойылымдарында басты назарға алынатын тақырыптар. Осыдан 14 жыл бұрын Жасөспірімдер театрында сахналанған "Қызыл орамалды Шынарым" да адам бойындағы нәзік сезімді кейіпкерлер арқылы ерекше жеткізеді. Сондықтан болар, қырғыз жазушысы Шыңғыс Айтматовтың қаламынан шыққан туынды көрерменді қанша көрсе де жалықтырмай келеді.

"Сол кездегі сәттердің бәрі әлі кезге дейін есімде. Талғат ағай мінезді режиссерлардың бірі ғой. 2010 жылы мамыр айында премьерасы болған. Биыл бұйырса, 15-маусымға бара жатырмыз", - деді Ғ. Мүсірепов атындағы Қазақ мемлекеттік академиялық балалар мен жасөспірімдер театрының актрисасы Аида Жантілеуова.

"Көрермендер үшін бұл жақсы тосынсый болмақ. Талғаттың кинорежиссер ретінде де, театр режиссері ретінде де талғамы жоғары екенін жұрт біледі. Кез келген нәрсені қоймайтынын, кез келген нәрсені қозғамайтынын тағы білеміз", - деді жазушы, Қазақстанның еңбек сіңірген қайраткері Смағұл Елубай.

Адам өмірінің өзі – жол. Оның қайдан басталып, қайда алып баратыны беймәлім деген ойды жеткізетін спектакль қоюшы режиссердің шеберлігін талап еткен. Бүгінде кеңейтілген нұсқада ұсынылып жүрген, Ілияс пен Әселдің кіршіксіз сезімі суреттелетін қойылым -  киногердің танымал жұмыстарының бірі.

"Негізінде бұл спектакльдің өн бойы адамгершілікті, махабатты, өкінішті, адамның пенде болған жерін көрсетеді. Спектакльдің осы бүгінгі тойдың қарсаңында көрсетілуіне өз басым ризамын", - деді ҚР халық әртісі Талғат Теменов.

Қазақстанның халық әртісі, «Құрмет» және «Парасат» ордендерінің иегері Талғат Теменов бүгінде 20-ға жуық қойылымға жетекшілік етіп, 10-ға жуық фильмді жарыққа шығарған. Оның өзі жазған сценарийі бойынша қойған көркем фильмдері қатарында “Шаңырақ”, “Адамдар арасындағы бөлтірік", “Қызғыш құс”, “Махаббат бекеті” сынды туындылары бар.

Жансая Олжабек, Хангелді Ахметханов, АlmatyTV

Оқи отырыңыз: Қазақстан экономиканы қолдау үшін 105 млрд йен қарыз алатын болды