«Астана Банкі» салымшыларына өтемақы төлеу мерзімі ұзартылды

Қазақстанның депозиттерге кепілдік беру қоры «Астана Банкі» АҚ салымшыларына өтемақы төлеу уақытын тағы жарты жылға ұзартады, деп хабарлайды ҚазАқпарат.

ҚДКБҚ және «Еуразиялық банк» АҚ (агент банк) осындай келісім жасасты. Төлем басталған сәттен бастап, яғни 2019 жылдың 26 қаңтарынан «Астана Банкі» АҚ-ның 52 мың салымшысы агент банкке өтемақыны алу жөнінде өтініш жасады. Содан бері жалпы сомасы 36,9 млрд теңге өтемақы төленді.

Осылайша, ҚДКБҚ «Астана Банкі» АҚ салымшылары алдындағы міндеттемелерін 98,4% -ға өтеді. Қалған 1,6% – негізінен шоттардағы шағын қалдықтар. Оны алуға адамдар, әдетте, асықпайды. Атап айтқанда, «Астана Банкі» АҚ салымшыларының 64% депозиті 1000 теңгеден аз, 79% депозиті 5 000 теңгеден аз.

«Астана Банкінің» 216 мың салымшысы төлемді қайтаруға жүгінбеген. Төлем басталғаннан кейін жарты жылдан соң «Астана Банкі» АҚ салымшылары агент банкке өтініш беруді жалғастыруда. Соңғы айда агент банкке күніне 115 өтініштен келіп түсті.

ҚДКБҚ және «Еуразиялық банк» АҚ «Астана Банкі» АҚ салымшыларына өз қаласында, өз ауданында өтемақы ала алатынын ескертеді. Өтемақы алу үшін 2020 жылдың 26 қаңтарына дейін кез келген бөлімшеге кез келген жұмыс күні хабарласуға болады.

Салымшыдан сұралатын жалғыз құжат – жеке куәлік пен өтініш, оның бланкін агент банктің бөлімшесінде толтыруға болады.