Олжас Бектенов Президенттің нақты секторды дамыту жөніндегі тапсырмаларының орындалуын тексерді

Премьер-министр Олжас Бектенов Астана қаласына жұмыс сапары барысында Президенттің өнеркәсіпті, логистикалық инфрақұрылымды дамыту және агроөнеркәсіптік кешен өнімдерін терең өңдеу жөніндегі тапсырмаларының орындалуын тексерді, - деп хабарлайды Almaty.tv тілшісі Үкіметтің баспасөз қызметіне сілтеме жасап.

Әкімдіктің мәліметінше, елорда экономикалық өсімнің жоғары қарқынын сақтап отыр. Өткен жылдың қорытындысы бойынша жалпы өңірлік өнім 18,9 трлн теңгеге жетті. Осы жылдың алғашқы төрт айында қала экономикасына 587 млрд теңге инвестиция тартылса, оның шамамен 80%-ын жеке салымдар құрады. Астанада 246 мың шағын және орта бизнес субъектісі жұмыс істейді, олар шамамен 560 мың адамды жұмыспен қамтып отыр.

Премьер-министр заманауи логистикалық орталықта болып, қойма кешенінің жұмысымен және көлік-логистикалық инфрақұрылымды дамыту жоспарларымен танысты. Сондай-ақ Үкімет басшысына жеке инвестиция көлемі 300 млн доллардан асатын жаңа логистикалық парк жобасы мен 6 мыңға жуық жұмыс орнын ашуға мүмкіндік беретін ірі логистикалық хабтың құрылыс барысы таныстырылды.

Сапар аясында Үкімет басшысы медициналық бұйымдар шығаратын жаңа кәсіпорынның жұмысын көрді. Зауыт донорлық ағзаларды сақтау және тасымалдауға арналған жабдықтарды, сондай-ақ медициналық шығын материалдарының кең түрін шығаратын болады. Жобаға салынған инвестицияның жалпы көлемі шамамен 5,1 млрд теңгені құрады.

Бұдан бөлек, Олжас Бектенов нан-тоқаш және сүт өнімдерін шығаратын кәсіпорындарға барды. Жобалардың жалпы құны 8,8 млрд теңгені құрайды. Өндірістік қуаттылық тәулігіне 25 тоннаға ENDЕМ ұн өнімдерін және 100 тоннаға дейін сүт өнімдерін шығаруға мүмкіндік береді. Кәсіпорындар елорданың азық-түлік қауіпсіздігін қамтамасыз етуге бағытталған және отандық шикізатты пайдаланады.

Ет өңдеу зауытында Премьер-министрге кәсіпорын толық қуатына шыққаннан кейін жылына 18 мың тоннадан астам өнім шығара алатыны және 300-ге дейін адамды жұмыспен қамтитыны баяндалды. Мамандарды даярлау үшін студенттерді кейіннен жұмысқа орналастыру мүмкіндігімен оқыту ұйымдастырылған.

Сапар қорытындысы бойынша Олжас Бектенов өнеркәсіпті, логистиканы және өнімді терең өңдеуді дамыту Үкіметтің негізгі басымдықтарының бірі болып қала беретінін баса айтты. Оның сөзінше, әрбір жаңа жоба жұмыс орындарын ашуға, инвестиция тартуға және азаматтардың өмір сүру сапасын арттыруға септігін тигізуі тиіс.

Оқи отырыңыз: Алматыда монша кешендеріне арналған экологиялық талаптар талқыланды