Коронавирус: Италия билігі азаматтардың ел ішіндегі қозғалысын шектеді

Covid-2019: 10 наурыздан бастап Италияның барлық аумағы «қызыл аймақ» деп жарияланды, ал Израиль елге келгендердің барлығын карантинге жібереді, деп хабарлайды ҚР Сыртқы істер министрлігінің баспасөз қызметі.

9 наурызда кешке Италия Премьер-министрі Конте Джузеппе Covid-2019 коронавирусы елде таралуына байланысты мәлімдеме жасап, оған сәйкес Италияның барлық аумағы 10 наурыздан бастап «қызыл аймақ» деп жарияланды және төтенше шаралар енгізілді.

Атап айтқанда, еңбек қызметі, денсаулық жағдайымен байланысты сапарлардан және аса қажетті жағдайлардан басқа, ел бойынша маңызды себепсіз қозғалу шектелген.

Қазіргі уақытта солтүстік өңірлерде орналасқан (Ломбардия аймағы және 14 провинция, сондай-ақ Милан, Бергамо, Тревизо, Болонья, Венеция және Римини қалаларының әуежайлары) Италия әуежайлары арқылы шетелдік азаматтардың келуіне және шығуына шектеулер қолданылуда. Аталған қалалардың аумағына туристер үшін кіруге тыйым салынады. Алайда шектеулер қоғамдық көліктің жұмысына қолданылмайды.

Бұған дейін Италияның мәдениет министрлігі ағымдағы жылдың 8 наурызынан бастап елдегі барлық мәдени мекемелердің жабылғанын жариялады. Ватиканда мемлекет-қала аумағындағы барлық мұражай, сондай-ақ Римдегі папалық базиликалар жанындағы мұражайлардың ү.ж. 3 сәуіріне дейін жабылуы туралы ескертілген.

Қазақстанның Италиядағы Елшілігі құрған жедел штаб күшейтілген режимде жұмыс істейді. Италия аумағындағы отандастарда сұрақтар туындаған жағдайда келесі мекенжай арқылы хабарласу қажет: Via Cassia, 471 Roma. Тел.: +390 636 301 130, e-mail: roma@mfa.kz.

Өз кезегінде, Израиль өз аумағында Covid-2019 коронавирустың тарауынан қосымша қорғау шараларын қабылдайды. Атап айтқанда, Израиль үкіметі барлық елдерден келетін шетелдіктерді карантинге жіберу туралы шешім қабылдады. Бұл ереже ү.ж. 9 наурызда сағат 20:00-ден бастап Израильге келетін барлық адамдар үшін күшіне енді.

Израиль аумағына елде болған толық кезеңде тұрақты мекен-жайы бар және сол жерде карантинде болуы тиіс туристер ғана кіре алады.

Шетелден келгендерге арналған жаппай карантин алдағы екі апта бойы қолданылады, содан кейін үкімет жағдайды зерттеп, одан әрі шешім қабылдайды.

Қазақстанның Израильдегі Елшілігімен келесі мекенжай арқылы байланысуға болады: 52A, Hayarkon Street, Tel Aviv. Тел.: + 972 3516 3411, e-mail: tel-aviv@mfa.kz.