Ақмола тұрғыны 7,5 млн теңгені өз қолымен алаяқтың шотына салған

Ақмолалық тұрғын 7,5 млн теңгеге алданды. Степногорск қаласы полиция басқармасы жергілікті тұрғынға қатысты алаяқтық фактісі бойынша қылмыстық істі тергеп жатыр, деп хабарлайды Almaty.tv тілшісі Polisia.kz-ке сілтеме жасап.

«Қылмыскерлер ер адамды алдау үшін бүтін бір жоспарды ойлап тапқан. Жәбірленушіге алдымен өздерін қалалық әкімдіктің лауазымды адамы деп таныстырып, содан кейін өздерін күш ведомствосының қызметкерлері және Ұлттық банктің қызметкерлері деп атаған белгісіз адамдардан қоңыраулар түсе бастаған. Олар Степногорск қаласының барлық банкінде жәбірленушінің атына онлайн несиелер ресімделгендігін, бірақ егер өтініш беруші несие ресімдеп, ақшаны оларға аударса, заңсыз әрекеттердің алдын алуға болады деп сендірген», - деді полиция.

Қоңырау шалушыларға сеніп, ақмолалық 4,5 миллион теңгеге несие рәсімдеп, қолма-қол ақша алып, кейін алаяқтар көрсеткен шоттарға аударған.

«Алайда алаяқтардың сенім ұялатқаны соншалық, ер адам сол күні 3 млн теңгеге тағы бір несие рәсімдеді. Өтініш берушінің өзі тағы да бірнеше банкке барды, алайда оған несие беруден бас тартылды. Кейіннен ақмолалық 7,5 миллион теңгені әр түрлі сомамен 20-дан астам түрлі банктік шоттарға аударған», - деп түсіндірді полиция.

Қазіргі уақытта алаяқтық фактісі бойынша сотқа дейінгі тергеу жүргізіліп жатыр.

Оқи отырыңыз: Құмар ойынның құрығында жүргендерге қандай көмек көрсетіледі