Батыс Қазақстан облысының полицейлері 670 млн теңгеге жуық контрабандалық тауарды анықтады, деп хабарлайды Almaty.tv тілшісі Батыс Қазақстан облысының Полиция департаментінің баспасөз қызметіне сілтеме жасап.
БҚО ПД ұйымдасқан қылмысқа қарсы күрес басқармасының қызметкерлері патрульдік полиция батальонымен бірлесіп, Орал-Бузулук автожолында екі ауыр жүк көлігін тоқтатты. Олардың бірінен 1 мың 348 қорап ірімшік өнімі табылды. Тауарды жалған жүкқұжат арқылы тұз ретінде тасымалдаған. Ірімшіктің құны шамамен 320 миллион теңге болды.
Екінші автокөліктен акциздік маркалары жоқ, 1 мың 755 қорап MILANO маркалы темекі салынған қораптар табылып, тәркіленді. Бұл тауар жалған жүкқұжат бойынша құбырлар ретінде тасымалданған. Тәркіленген темекінің құны шамамен 350 млн теңгеден асады.
Күдіктілер контрабандалық тауарлармен мемлекеттік шекарадан өтпек болған. Тәркіленген тауардың болжамды жалпы сомасы 670 млн теңгені қамтыды. Заң бұзушыларға айналымнан алып қойылған заттардың немесе айналымы шектелген заттардың контрабандасы фактісі бойынша қылмыстық іс қозғалды.
Оқи отырыңыз: Түркістан облысының полицейлері 600-ге жуық құқық бұзушылықты анықтады
