Түркістандық полицейлер рецептсіз трамадол сатқан дәрігерді ұстады

Түркістандық полицейлер 300-ден астам трамадол сатқан дәрігерді ұстады, деп хабарлайды Almaty.tv тілшісі Policia.kz-ке сілтеме жасап.

ПД есірткі қылмысына қарсы іс-қимыл басқармасының қызметкерлері Шардара қаласындағы дәріхананың бірінде трамадол препаратын заңсыз сату дерегін анықтады.

"Дәріхана сатушысы ұсталды. Тексеру кезінде оның 30 мың теңгеге әсері күшті трамадол препаратының 340 таблеткасын рецептсіз сатқаны анықталды. Бұл жайт Шардара АПБ-ға тіркеуге алынды", – деді Түркістан облысы ПД бастығының орынбасары Құрманбек Сахов.

Аталған фактіге қатысты жинақталған материалдар Түркістан облысы бойынша Медициналық және фармацевтикалық бақылау комитетінің департаментіне ҚР ӘҚБтК 426-бабы 1-бөлігі "Фармацевтикалық қызметтің және дәрілік заттар мен медициналық бұйымдардың айналысы саласының қағидаларын бұзу" бойынша жолданды.