Петропавлда алаяқтықтың жаңа түрі тіркелді

Тәртіп сақшылары қала тұрғындарын алдап соққан күдіктіні анықтап, ұстады, деп хабарлайды Almaty.tv.

Polisia.kz мәліметінше, тамыздың басында Петропавл қаласының полиция басқармасына интернет-алаяқтық туралы өтінішпен 22 жастағы жігіт пен қыз жүгінді. Олардың ешқандай несиеcі болмаған. Алайда ломбардқа мерзімі өткен төлем туралы SMS-хабарламалар алған.

Бір ай бұрын паркте оларға бейтаныс жас жігіт келіп, телефондарын белгілі бір дерекқор арқылы тексеруді ұсынған. Оның көмегімен гаджеттің ұрланбаған екенін растауға болады деп түсіндірген. Жәбірленушілер өздерінің телефоны мен жеке куәліктерін суретке түсіруге, сондай-ақ IMEI-кодтарын жазып алуға мүмкіндік берген. Бәрін жазып алған бейтаныс телефонның «базада тіркелмегенін» айтқан. Кейіннен жәбірленушілер олардың құрылғылары онлайн-режимде қарыз беретін ломбардтың кепілі болғанын білген. Келтірілген залал әр жағдайда 35 мың теңгені құрады.

Жедел-іздестіру іс-шараларының нәтижесінде Солтүстік Қазақстан облысы Полиция департаменті криминалдық полиция басқармасы және Петропавл қаласының Cyberpol тобының қызметкерлері күдіктіні анықтады. Ол 18 жастағы Петропавл қаласының тұрғыны болып шықты. Ол 13 тамызда Жұмабаев көшесінің бойында ұсталды.

Аталған оқиғалар бойынша сотқа дейінгі тергеу жүргізіліп, күдіктінің басқа да қылмысқа қатысы бар-жоғы тексеріліп жатыр. Құпия деректеріңізді ешкімге бермеуіңізді сұраймыз. Барынша сақ болыңыздар, – дейді Солтүстік Қазақстан облысы полиция департаменті криминалдық полиция басқармасының бастығы Иван Терзиди.

Жыл басынан бері Солтүстік Қазақстан облысында 453 интернет-алаяқтық тіркелген, оның ішінде 75-і микроқаржы ұйымдарынан өзгенің атына несиелерді ресімдеумен байланысты.

Оқи отырыңыз: СҚО-да ірі көлемдегі ұрлықтың беті ашылды