Астанадағы мектептердің бірінде құрт-құмырсқа қаптап кетті

Астанадағы мектептердің бірін құрт-құмырсқа қаптаған. Бүгін таңертең әлеуметтік желіде табалдырықта жыбырлап жүрген жәндіктердің бейнежазбасы тарап кетті, деп хабарлайды Almaty.tv тілшісі.

Сәрсенбінің таңында дәл осы бейнежазба әлеуметтік желіге тарап, жұртты алаңдатты. Бұл – Астанадағы мектептердің бірінде болған оқиға. Оқушылар қабырғада жүрген жәндіктерді видеоға түсіріп алған. Тіпті еденде де емін-еркін жорғалап жүргендерін байқауға болады. Пікірлер арасында «мұндай жағдай жыл сайын қайталанады» деген жазбалар да бар. Ал мұны ата-аналардың бірі білсе, енді бірі естімепті.

– Әлеуметтік желіден көрдік. Біз білмейміз, қызым осында оқиды, – деді қала тұрғыны Марал Сәбитова.

Қызу талқыға түскен бейнежазба қыздардың киім ауыстыратын бөлмесі екен. Қазір ол кабинеттің есігі тарс жабылып, кіруге тыйым салынған. Мектеп директорының сөзінше, жәндіктер жүрген бөлмеге жақын кабинеттерді бүгін санитарлық-эпидемиологиялық бөлім мамандары тексерген екен, ошақтар анықталмапты. Мектеп директоры білім мекемесіне соңғы рет дезинфекциялық тазалау жұмыстары өткен айда ғана жүргізілгенін айтты.  

– 12 қаңтарда дезинфекциялық тазалау жұмыстарын жүргізу үшін мамандарды шақырып отырмыз. Іс-шара балалардың өмір қауіпсіздігіне әсер етпеуі үшін кешкілік уақытта жүргізілетін болады. Жәндік шыққан қыздар бөлмесін ауыстырдық, – деді №73 мектеп-лицейінің директоры Гүлшат Қалтаева.

Екі мыңнан астам оқушы білім алып жүрген №73 мектепке биыл 10 жыл толып отыр. Жәндіктерден тазалау жұмыстары ай сайын жүргізіледі екен.

Мектеп директорының сөзінше, осы уақытқа дейін білім ошағында құрт-құмырсқаларды улап келген компаниямен келісімшарт бұзылған. Ал қалалық білім басқармасы жауапсыз мердігерді сотқа бермекші. Ендігі тазалау жұмыстары 12 қаңтарға белгіленді.

Өмір Серікбекұлы, Данияр Омар, Дастан Темірбекұлы, «Алматы» телеарнасы, Астана

Оқи отырыңыз: Ақшадан қатты қысылған астаналық жалдамалы пәтердегі мүлікті сатты