Астанада 4 мыңнан астам бала мектепке балшық кешіп, баруға мәжбүр

Астанада 4 мыңнан астам бала мектепке балшық кешіп, әрең жетіп жүр. Жаңа білім ошағына қатынау оқушылар үшін мұңға айналған, деп хабарлайды Almaty.tv тілшісі.

Балалардың күнделікті балшықты кешіп өтуге мәжбүр. Шағым айтқан жұртшылық мектепке барып-келудің күн жылынғалы қиындай түскен. Ал қыста көктайғақ, мұзда құлап жатамыз деп мұңын жеткізген ата-аналарды әбден мезі еткен.

«Өліп қалса кім жауап береді? Не болады? Біреу мәселені шешу керек қой. Ертең қар ериді, сонда не істейміз. Екінші аяқ киіммен барады ғой. Сонда да өте алмайды», – деді қала тұрғыны Наталья Геллерт.

Жаңа білім ошағы желтоқсан айында қолданысқа берілген. Халық жазушысы Әбіш Кекілбаевтың есімімен аталған оқу ордасы 2 ауысымды екен. Мектеп 4 мың оқушы орнын қамтиды. Көркі көз қызықтырар білім ошағы қолданысқа берілгенде ата-аналар қауымы қуанған еді. Алайда, оған апарар жолдан қуаныштары су сепкендей басылған халық «зәулім ғимаратты салғанда мәселені ескермегеніне наразы.

«Көріп тұрсыздар, балалардың жүріп-тұруына жағдай жоқ. Иттер де көп жүреді. Балаларды қауып ала ма дейсің. Ол туралы да жаздық. Жауап жоқ. Менің балам құлап, 2 аптадан кейін кеше сабаққа барды. Үйге келгенде үсті түгел батпақ», – деді қала тұрғыны Махаббат Есімова

Бұл мектептің қолданысқа берілгеніне 4 айдан асты. Әлі күнге мектепке апарар жол жасалмаған. Күнделікті оқушылар мұзда құлап, осындай балшық кешіп, білім ошағына жетуге мәжбүр.

«Осы жылы Бөкейханов пен Рысқұлбеков көшесінен бастап жол саламыз. Асфальт төселіп, жарықпен қамтамасыз етіледі. Қаражат бар. Ал қазір уақытша адамдар өте үшін  тас төсемдерін төгеміз», – деді Көлік және жол-көлік инфрақұрылымын дамыту басқармасының бөлім басшысы Қайрат Аманжолов

Жауаптылар жолдың жөнделетініне сендірді. Қыста қонышына қар кіріп, ол ерісе саз балшық кешетін оқушыларға тағы 2-3 ай амалдай тұруға тура келеді.

Кәмшат Мұхамеджан, Данияр Омар, Ринат Өтеев, «Алматы» телеарнасы, Астана